Department of Fisheries Post-harvest Technologies and Quality Control (DFPTQ)

^{អំពីយើង}
FiA និង DFPTQ

រដ្ឋបាលជលផល (FiA) គឺជាអង្គភាពរដ្ឋចំណុះឱ្យក្រសួងកសិកម្ម រុក្ខាប្រមាញ់និងនេសាទមានភារកិច្ចគ្រប់គ្រង អភិរក្ស និងអភិវឌ្ឍន៍ ធនធានជលផលប្រកបដោយនិរន្តរភាព។ បេសកកម្មចម្បងៗរបស់រដ្ឋបាលជលផល រួមមាន៖ (i) ការគ្រប់គ្រង គ្របដណ្តប់លើកិច្ចការ រដ្ឋបាល គ្រប់គ្រងនិងអភិវឌ្ឍន៍ធនធានជលផល និងសហគមន៍នេសាទ, (ii) ការតាក់តែងច្បាប់ស្តីពីជលផល គោលនយោបាយពាក់ព័ន្ធ រៀបចំផែនការ និងអនុវត្តច្បាប់ប្រកបដោយប្រសិទិ្ធភាព និង (iii) ការផ្តល់បច្ចេកទេស ផ្តោតលើការស្រាវជ្រាវវិទ្យាសាស្ត្រ អភិរក្ស និង អភិវឌ្ឍន៍បច្ចេកវិទ្យាផ្នែកនេសាទ និងវារីវប្បកម្ម តាមដាននិងត្រួតពិនិត្យវិស័យជលផលជារួម។ នាយកដ្ឋានបច្ចេកវិទ្យាកែច្នៃ និងគុណភាព (DFPTQ) ស្ថិតនៅក្រោមការគ្រប់គ្រងរបស់ FiA ទទួលបន្ទុកត្រួតពិនិត្យនិងអធិការកិច្ចទីតាំងបែងចែកផលនេសាទ និង សហគ្រាសកែច្នៃផល ផលិតផលជលផលទាំងអស់ និងចេញវិញ្ញាបនប័ត្រសម្រាប់នាំចេញផលិតផល។

នាយកដ្ឋានបច្ចេកវិទ្យាកែច្នៃនិងគុណភាព (DFPTQ) គឺជាអាជ្ញាធរមានសមត្ថកិច្ចរបស់កម្ពុជា មានភារៈនិងការប្តេជ្ញាចិត្តខ្ពស់ធានានូវ ចរាចរណ៍ទីផ្សារផល ផលិតផលជលផលដែលមានគុណភាពនិងសុវត្ថិភាព តាមរយៈការអនុវត្តប្រព័ន្ធត្រួតពិនិត្យនិងអធិការកិច្ចដែល មានប្រសិទិ្ធភាពខ្ពស់នៅតាមទីតាំងបែងចែងផលនេសាទនិងសហគ្រាសកែច្នៃនៅទូទាំងប្រទេស។ ការអនុវត្តបច្ចេកវិទ្យាកែច្នៃក្រោយ ប្រមូលផលទំនើប និងគ្រប់គ្រងគុណភាពដែលឆ្លើយតបទៅនឹងបទដ្ឋានអន្តរជាតិក្នុងការលើកកម្ពស់ផល ផលិតផលជលផលដែល មានសុវត្ថិភាព គឺជាចក្ខុវិស័យវែងឆ្ងាយរបស់នាយកដ្ឋាន។ យើងបន្តគាំទ្រដល់សហគ្រាសក្នុងស្រុកកែច្នៃផលិតផលទទួលស្គាល់ គុណភាព ដែលមិនត្រឹមតែបម្រើដល់អតិថិជនក្នុងស្រុក តែទទួលបានជំនឿទុកចិត្តពីអតិថិជននៅក្នុងពិភពលោក តាមរយៈការផលិតផលិតផលជលផលដែលមានសុវត្ថិភាព និងគុណភាព រួមទាំងការផ្តល់ជូនវិញ្ញាបនបត្រសុខភាពសម្រាប់នាំចេញ។ យើងមានគោលដៅអភិវឌ្ឍន៍វិស័យជលផលរបស់កម្ពុជា រួមចំណែកដល់កំណើនសេដ្ឋកិច្ច ការពារសុខភាពនិងសុខុមាលភាពរបស់អ្នកប្រើប្រាស់ក្នុងស្រុកនិងក្រៅប្រទេស។